El conceyu L.lena, allúgase en plenu corazón de la Montaña Central asturiana. Tien una situación estratéxica, yá que llenda al sur cola provincia de Lleón, y esto condicionó siempre a esti conceyu como nexu d’unión del Principáu cola Meseta. A lo llargo los sieglos, siguen altravesando esti conceyu infraestructures tan importantes como La Vía La Carisa, el Camín de Santiago, la Ruta La Plata y más recientemente l’autovía del Güerna, ensin escaecer la construcción, tovía n’obres, de la Variante del Güerna que va permitir la entrada del ferrocarril d’alta velocidá n’Asturies.
Pola so situación xeográfica, con un relieve tan accidentáu, los montes siempre fueron ún de los elementos más característicos de L.lena. Munchos picos superen los 2.000 m d’altitú, como Penubiña con 2414 m, el Siete con 2361m, el Portillín con 2.261m… Esto condicionó la vida de los vecinos del conceyu, acostumbraos a la montaña, que supieron dende siempre aprovechar al máximo tolos elementos que’l monte mos ofrez, tanto pa la subsistencia, como aprovechamientu de pastos, de caza, de pesca, etc. Como l’aprovechamientu como elementu d’ocio, cola práctica del esquí, de la escalada, del senderismu…
El conceyu de L.lena, tien amás de riqueza paisaxística, una gran riqueza cultural y artística. Santa Cristina de L.lena, edificiu del arte asturiano, ye dende 1985 Padremuñu de la Humanidá. Amás de la visita a Santa Cristina, aconseyamos la visita al Aula Didáctica del Prerrománico Asturiano, onde se pue conocer más sobre esti tipu d’edificios, y de la historia del Reinu Astur. N’abondos pueblos del conceyu puen vese impresionantes palacios rurales como’l Palaciu de los Mendoza en Zurea o’l Palaciu Revillagigedo en Campumanes, sin olvidase de la Casa Natal de Vital Aza, reconocíu escritor de La Pola, que ye Bien d’Interés Cultural. El conxuntu arquitectónicu de Las Puentes, formáu por ilesia, casa rectoral y puente, declaráu padremuñu históricu artísticu.
Les fiestes y la gastronomía danse la mano nel conceyu L.lena. Les fiestes de La Flor, celébrense al otru llunes del llunes de pascua. Ye tradición xubir al preu de la fiesta con empanaes y bollos preñaos que se puen mercar el fin de selmana anterior nel Mercáu Tradicional que se celebra en La Pola, convirtiéndose nuna de les fiestes más tradicionales del conceyu. Nel primer domingo de xuneto la fiesta d’El Corderu, declarada d’interés turísticu nacional, ásense a la estaca decenes de corderos nel Altu de La Cobertoria. Coincidiendo col puente de Begoña, n’agosto, Carabanzo celebra les sos fiestes. El Festival Astur Romano yá ye una visita obligada en toa Asturies pola so orixinalidá, yá que se recuerda; por parte de los vecinos del pueblu, la llucha ente los astures y los romanos, eso sí, siempre nun ambiente festivu, y regao de buenos víveres y beberaxes celtes. La seruenda empieza en L.lena cola celebración de Les Feries en La Pola, n’octubre, onde ye típico’l comer unos bonos callos p’aguantar los primeros fríos serondiegos.
El conceyu de L.lena pue visitase y disfrutase en cualquier época del añu, el coloríu de la naturaleza en primavera, les fiestes del veranu, los colores marrones de les viesques na seruenda y la nieve y l’esquí n’inviernu.
